കാസർഗോഡ് ജില്ലാ സമ്മേളനം

ജനാധിപത്യത്തിൻ്റെ നെടു തൂണുകൾ അപകടത്തിലായതാണ് ഇന്ത്യ നേരിടുന്ന ഏറ്റവും വലിയ ഭീഷണി: പ്രൊഫസർ: കാനാ എം.സുരേശൻ

കൊടക്കാട് : ജുഡീഷ്യറി എക്സിക്യൂട്ടീവ്, പ്രസ് തുടങ്ങിയ ജനാധിപത്യത്തിൻ്റെ നെടും തൂണുകൾ വലിയ അപകടത്തിലാണെന്ന് പ്രഫ. കാന എം. സുരേശൻ പറഞ്ഞു.കേരള ശാസ്ത്രസാഹിത്യ പരിഷത്ത് കാസർകോട് ജില്ലാ സമ്മേളനം, കൊടക്കാട് പൊള്ളപ്പൊയിൽ കൈരളി ഓഡിറ്റോറിയത്തിൽ ഉദ്ഘാടനം ചെയ്ത് സംസാരിക്കുകയായിയായിരുന്നു അദ്ദേഹം.

 അന്ധവിശ്വാസങ്ങൾ, അനാചാരങ്ങൾ, കപടശാസ്ത്രങ്ങൾ തുടങ്ങി സാമൂഹ്യ വിരുദ്ധമായ പലതും തഴച്ചു വളരുന്ന പുതിയ കാലത്താണ് നമ്മൾ ജീവിക്കുന്നത്. അദ്ദേഹം പറഞ്ഞു.എൻഡോസൾഫാൻ കൊണ്ടു മാത്രമല്ല, മനുഷ്യർക്ക് രോഗങ്ങൾ വരുന്നതെന്നും പ്രഫ. സുരേശൻ അഭിപ്രായപ്പെട്ടു.ഓർഗാനിക് ഫാമിംഗിന് ഒരടിസ്ഥാനവുമില്ല.ശാസ്ത്രമാണ് ശരി, പാരമ്പര്യത്തെ നിരാകരിക്കേണ്ടവയാണെങ്കിൽ, അവയോട് മൃദുസമീപനം പാടില്ല. 

ഉപഗ്രഹവിക്ഷേപണ ദൗത്യവുമായി ബന്ധപ്പെട്ട് ഗണപതിയ്ക്ക് തേങ്ങ ഉടയ്ക്കലും, അതിൻ്റെ നിർമ്മിതിയുടെ മിനിയേച്ചർ രൂപം തിരുപ്പതി ഭഗവാന് സമർപ്പിക്കകയും ചെയ്യുന്ന സഹപ്രവർത്തകരായ ശാസ്ത്രജ്ഞരോടുള്ള തൻ്റെ പ്രതിഷേധവും അദ്ദേഹം തുറന്ന് പറഞ്ഞു.

പരിഷത്ത് ജില്ലാ പ്രസിഡൻ്റ് വി.ടി.കാർത്ത്യായനി അധ്യക്ഷത വഹിച്ചു.പിലിക്കോട് ഗ്രാമപഞ്ചായത്ത് പ്രസിഡൻ്റ് പി.പി.പ്രസന്നകുമാരി, ഇ. കുഞ്ഞിരാമൻ, എ.വി.രമണി, ടി.വി.ശ്രീധരൻ, സി.എം.വിനയചന്ദ്രൻ, പി.പി രാജൻ,എ.എം.ബാലകൃഷ്ണൻ, പ്രദീപ് കൊടക്കാട്, പി.പി.സുകുമാരൻ സംസാരിച്ചു. രണ്ടു ദിവസങ്ങളിലായി നടക്കുന്ന സമ്മേളനം നാളെ (വെള്ളി ) സമാപിക്കും.