ശാസ്ത്രഗതി എം.പി. പതിപ്പ്
ശാസ്ത്രഗതി 2025 മാർച്ച് ലക്കം എം.പി. പരമേശ്വരൻ പതിപ്പാണ് . പരിഷദ് പ്രവർത്തകർ തീർച്ചയായും വായിക്കുകയും സൂക്ഷിച്ചു വെയ്ക്കുകയും ചേയ്യേണ്ട എം.പി പതിപ്പിൻ്റെ സവിശേഷതകളെക്കുറിച്ച് ശാസ്ത്രഗതി എഡിറ്റർ എഴുതുന്നു
എം പി പരമേശ്വരൻ : വ്യക്തിഗത പരിശ്രമത്തിൻ്റെ ശക്തി
സാമൂഹിക മാറ്റം സാധ്യമാവുന്നത് സ്ഥാപനപരമായ പരിഷ്കാരങ്ങളുടെയോ, പ്രസ്ഥാനങ്ങളുടെ വിപ്ലവങ്ങളുടെയോ ഫലമായാണ് മാത്രമായാണ് പലപ്പോഴും വിലയിരുത്തപ്പെടുന്നത്. എന്നാൽ നിരന്തര പരിശ്രമങ്ങളിലൂടെ സമൂഹ ഗതിയെ മാറ്റിമറിച്ച വ്യക്തികളുടെ ഉദാഹരണങ്ങളാൽ ചരിത്രം സമ്പുഷ്ടമാണ്. ഗ്രാംഷിയുടെ സാംസ്കാരിക മേധാവിത്വ സിദ്ധാന്ത൦ അധികാര ഘടനകളെ വെല്ലുവിളിക്കുന്നതിനും പുതിയ സാമൂഹിക മാതൃകകൾ അവതരിപ്പിക്കുന്നതിനുമുള്ള വ്യക്തികളുടെ നിരന്തരമായ പരിശ്രമത്തിൻ്റെ പ്രാധാന്യത്തിന് അടിവരയിടുന്നു. ഒരു വ്യക്തിക്ക് സമൂഹത്തെ മാറ്റണമെങ്കിൽ, ആധിപത്യ പ്രത്യയശാസ്ത്രത്തിനുള്ളിലെ അന്തർലീനമായ അസമത്വങ്ങളെയും വൈരുദ്ധ്യങ്ങളെയും തുറന്നുകാട്ടുന്ന എതിർ ആഖ്യാനങ്ങൾ അവതരിപ്പിച്ചുകൊണ്ട് ഈ സാംസ്കാരിക മേധാവിത്വത്തെ വെല്ലുവിളിക്കണം. ഇതിന് നിരന്തരമായ ബൗദ്ധിക ഇടപെടലും പൊതു വ്യവഹാരം രൂപപ്പെടുത്തുന്നതിൽ സജീവമായ പങ്കാളിത്തവും ആവശ്യമാണ്.
അവബോധവും മാറ്റത്തിനായുള്ള കാഴ്ചപ്പാടും കൊണ്ട് സായുധനായ ഒരു വ്യക്തിക്ക്, ആക്ടിവിസം, വിദ്യാഭ്യാസം, ബദൽ വ്യവഹാരം എന്നിവയിൽ ഏർപ്പെടുന്നതിലൂടെ സാമൂഹിക അവബോധത്തെ സ്വാധീനിക്കാൻ കഴിയും. ജൈവ ബുദ്ധിജീവികൾ ഒറ്റപ്പെട്ട് പ്രവർത്തിക്കുന്നില്ല; മറിച്ച്, അവർ എതിർ മേധാവിത്വ ആശയങ്ങൾ പ്രചരിപ്പിക്കാൻ സഹായിക്കുന്ന ശൃംഖലകൾ രൂപീകരിക്കുന്നു. എഴുത്ത്, പൊതു സംസാരം, സംഘടിപ്പിക്കൽ, അണിനിരത്തൽ എന്നിവയിലെ നിരന്തരമായ ശ്രമങ്ങളിലൂടെ, വ്യക്തികൾക്ക് വിശാലമായ സാമൂഹിക പ്രസ്ഥാനങ്ങൾക്ക് അടിത്തറയിടാൻ കഴിയും. ഇതിന്റെ കേരളത്തിലെ ഏറ്റവും ഉത്തമമമായ ഉദാഹരണമാണ് എം പി പരമേശ്വരൻ. തന്റെ തൊണ്ണൂറാം വയസ്സിലും കാണാൻ വരുന്നവരോട് അവർ ഉൾപ്പെട്ട പദ്ധതികളുടെ വിശദാംശങ്ങൾ ചോദിച്ചറിയുകയും, ആ പദ്ധതികളിൽ പ്രായോഗിക പരിപാടികൾ ആവിഷ്കരിക്കാൻ അവരെ ശക്തിപ്പെട്ടുത്തുന്ന രീതിയിൽ ഇടപെടുന്ന എം പി., ക്ഷീണമേശാത്ത സ്വപ്ന സാക്ഷാത്കാരകനാണ്.
കൂട്ടായ പ്രസ്ഥാനങ്ങൾ അനിവാര്യമാണെങ്കിലും, പലപ്പോഴും മാറ്റത്തിൻ്റെ തീജ്വാലകൾ ആളിക്കത്തിക്കുന്നത് പ്രതിബദ്ധതയുള്ള വ്യക്തികളുടെ അശ്രാന്ത പരിശ്രമമാണ്. സമൂഹത്തെ രൂപപ്പെടുത്തുന്നതിനുള്ള ഉത്തരവാദിത്തം സ്ഥാപനങ്ങൾക്കോ വലിയ പ്രസ്ഥാനങ്ങൾക്കോ മാത്രമല്ല, വിമർശനാത്മകമായി ചിന്തിക്കാനും നിർണ്ണായകമായി പ്രവർത്തിക്കാനും മറ്റുള്ളവരെ മികച്ച ഭാവിയിലേക്ക് പ്രചോദിപ്പിക്കാനും ധൈര്യപ്പെടുന്ന ഓരോ വ്യക്തിക്കുമുണ്ട് എന്ന് നമ്മളെ നിരന്തരം ഓർമിപ്പിക്കുന്നു എം പി. ഈ ലക്കം എം പിയുടെ ദർശനങ്ങളെ, പ്രവർത്തനങ്ങളെ അടുത്തറിഞ്ഞവരുടെ കുറിപ്പുകളാണ്. ഈ തലമുറയിലുള്ളവർക്കു പ്രചോദനവും ഊർജവുമാവാൻ വേണ്ടിയുള്ള കുറിപ്പുകൾ.
